सोन्याच्या दागिन्यांची चोरी; 16 लाखांचा मुद्देमाल जप्त

शहादा: शहादा-शिरपूर रस्त्यावर झालेल्या एका चोरीच्या घटनेतील आरोपीला स्थानिक गुन्हे शाखेने अटक केली आहे. आरोपीकडून तब्बल 16 लाख 95 हजार रुपयांचे सोन्याचे दागिने जप्त करण्यात आले आहेत.

10 एप्रिल रोजी परेश मुकेश कोठारी हे शहादा येथून शिरपूरकडे जात असताना त्यांच्या शेजारी बसलेल्या एका अज्ञात व्यक्तीने त्यांच्या बॅगेतील 18 लाख रुपयांचे सोन्याचे दागिने चोरले होते. या घटनेनंतर सारंगखेडा पोलीस ठाण्यात गुन्हा दाखल करण्यात आला होता.

आरोपीला अटक:

या गुन्ह्याचा तपास सुरू असताना स्थानिक गुन्हे शाखेला 31 जुलै रोजी मिळालेल्या माहितीनुसार, पोलिसांनी मगन चिमा वसावे (वय 24) याला शहादा येथील धान्य मार्केट परिसरातून ताब्यात घेतले. चौकशीत त्याने गुन्ह्याची कबुली दिली.पोलिसांनी आरोपीकडून चोरी झालेल्या 215.85 ग्रॅम सोन्यापैकी 197.10 ग्रॅम वजनाचे दागिने जप्त केले आहेत, ज्यांची किंमत 16 लाख 95 हजार रुपये आहे. या कारवाईमुळे स्थानिक गुन्हे शाखेने एका मोठ्या चोरीचा पर्दाफाश केला आहे. ही कारवाई पोलीस अधीक्षक श्रवण दत. एस यांच्या मार्गदर्शनाखाली स्थानिक गुन्हे शाखा आणि सारंगखेडा पोलिसांनी केली.